Апелляциялық сот алқасы Талдықорған қалалық сотының үкімін заңды деп танып, белсенділердің шағымын қанағаттандырмады
Жетісу облыстық соты «Атажұрт» белсенділеріне қатысты шығарылған сот үкімін өзгеріссіз қалдырды. Бұл туралы сотталушылардың туыстары мен ақпарат құралдары хабарлады. Естеріңізге сала кетсек, «Атажұрт» белсенділерін Қытай туын өртегені үшін Қылмыстық кодекстің 174-бабы, яғни «ұлтаралық алауыздық қоздыру» айыбымен сотқа тартып, Талдықорған қалалық соты оларды айыпты деп таныды.
«Атажұрт» ұйымының төрағасы Бекзат Мақсұтхан, сондай-ақ Қытайда сотталған Қазақстан азаматы Алимнұр Тұрғанбайдың жұбайы Гүлдария Шеризат бес жылға бас бостандығынан айырылды. Ал Гүлдария Шеризатқа қатысты үкімнің орындалуы баласы төрт жасқа толғанға дейін кейінге қалдырылды.
«Атажұрт» ұйымының белсенділері мен жақтастары Тұрсынбек Қаби, Еркінбек Нұрақын, Ербол Нұрлыбаев, Марғұлан Нұрданғазы, Қуандық Қосжанов, Бақытжан Шуғыл және Батылбек Байқазы бес жылға бас бостандығынан айырылды. Қанат Тұрдыбай мен Аян Қалымбек бес жылға бас бостандығын шектеу жазасына кесілді. Ал Беделхан Қабылашым 4 жыл 8 ай мерзімге бас бостандығын шектеу жазасын алды.
Өткен жылдың 13 қарашасында «Атажұрт» белсенділері Алматы облысындағы дала жолының бойында акция өткізіп, Қытай билігін сынға алып, өткен жылдың шілде айында Қытайда жұмыс барысында ұсталған этникалық қазақ Алимнұр Тұрғанбайды Қазақстанға қайтаруды талап етті.
Акция барысында олар Қытайдың үш туын және ҚХР төрағасы Xi Jinping-нің портретін өртеген.
Осы акциядан кейін белсенділер «ұсақ бұзақылық» бабы бойынша әкімшілік жауапкершілікке тартылды. Кейін оларға «алауыздық қоздыру» айыбы тағылды. Бұл бап бойынша олар 10 жылға дейін бас бостандығынан айырылуы мүмкін еді.
Адам құқықтарын қорғаумен айналысатын ұйымдар, атап айтқанда Amnesty International, Human Rights Watch, International Partnership for Human Rights және Адам құқықтарын қорғау және заңдылықты сақтау жөніндегі Қазақстан халықаралық Бюросы қамауға алынған белсенділерді босатып, оларға тағылған айыптарды алып тастауға шақырды.
7 сәуірде Қытай шекарасынан өткеннен кейін қытайлық шекарашылар ұстаған Қазақстан азаматы Алимнұр Тұрғанбайдың 2,5 жылға сотталғаны белгілі болды. Сот отырысы оның туыстарының қатысуынсыз өткен.
Қытай туын өртеу акциясы дәл осы Тұрғанбайдың ұсталуына наразылық ретінде өткізілген еді.
Сотталушылар өздерінің кінәсін мойындамады.
