Алмалы аудандық соты АЭС референдумы қарсаңында ұсталған белсенділерді түрме жазасына кеспеді. Олардың барлығы да төрт жыл бас бостандығын шектеу жазасына кесілді
Алматының Алмалы аудандық сотында АЭС референдумы қарсаңында ұсталып, «жаппай тәртіпсіздік жасауға» оқталды деген айыппен түрмеге қамалған бес белсендіге үкім оқылды. Естеріңізге сала кетсек, жарыссөзде прокурор оларға бес жыл түрме жазасын беруді сұраған еді. Алмалы аудандық сотының судьясы Ернар Қасымбеков белсенділерді түрме жазасына кеспей, олардың бостандығын шектеуге үкім шығарды.
Белсенділер Нұрлан Жаулыбаев, Жанат Қазақбай, Фазылжан Сыздықов, Нұрлан Темірғалиев пен Айдар Мүбәраков төрт жыл бас бостандығын шектеу, қоғамдық-саяси жұмыспен айналысуға тыйым салу жазасына кесілді. Үкім оқылған соң, белсенділер сот залынан босатылды.
Ернар Қасымбеков оларға тағылған айыпты қайта саралап, белсенділерді 272-баптың 1-бөлігімен емес, 3-бөлігімен соттауды жөн санады. «Сотталушылар халық арасында атом электр станциясының салынуына қарсы брошюралар тарату арқылы, сондай-ақ Алматы және Алматы облысының әртүрлі жерінде жиылыстар өткізу барысында халықты жаппай тәртіпсіздікке шақыруға қатысқан. Сотталушылар бұл іс-шараға қатысқанын сот мәжілісінде теріске шығарған жоқ. Алайда олардың пікірінше, олардың әрекеттері қылмысқа жатпайды. Бірақ іс материалдарында сотталушылардың халық арасында үгіт-насихат жүргізген кезде айтылған сөздері, олардан алғаш алынған брошюралардың саны олардың өз әрекеттерінде және әрекеттеріне халықты қоспақшы болғаны бекітіледі. Сондықтан да сот олардың әрекеттерін ауыр қылмыс – қылмыстық кодекстің 272-бабының 1-бөлігінен осы баптың ауырлығы орташа қылмыс санатына жататын 3-бөлігіне қайта саралады», деді үкім оқыған судья Ернар Қасымбеков.
Сонымен бірге, «сот сотталушылар егде жасқа келгендіктен, қоғамға қауіп төндірмейтінін және олар халықты митингіге шақыру құқыққа қайшы әрекеттерін осымен тоқтатқандарын және сотқа енді заңды бұзбайтынын айтқандарын ескеріп, оларға пробациялық бақылау белгілей отыра, бас бостандығын шектеу түріндегі жаза тағайындауға болады деген қорытындыға келді. Мұнымен қоса, мұндай қылмыстың алдын алу үшін олардың әрқайсысы қоғамдық-саяси қызметпен айналысу құқығынан айырылды», деп мәлімдеді Алмалы аудандық сотының судьясы.
Одан бөлек, сотталушыларға қосымша жаза тағайындалды. Бес белсендіге «бес жыл мерзімге саяси партиялар, саяси-қоғамдық бірлестіктер мен ұйымдарды құру, оларға мүше болу және олардың жұмысына қатысумен байланысты қызметпен айналысу құқығынан айыру түріндегі қосымша жаза тағайындалсын» деген үкім оқылды.
Сотталушылардың қорғаушысы Төлеген Берліқожа өздерінің үкіммен келіспейтінін жеткізді. «Ешқандай дәлелі болмағандықтан, осындай үкім шығарды» деген пікірін айтты. Одан бөлек, Берліқожаның сөзінше, сотталушылар апелляциялық, одан кейін кассациялық шағым түсіретінін де жеткізді. Осымен, Алмалы аудандық сотында үкім оқу процесі аяқталды. Сотталушылардың барлығы да бостандыққа шықты. Бұл да қуантарлық жаңалық деп айтуға болады
