«Просто журналистика» жобасының авторын алдымен полицияға шақырды. Кейін оның Инстаграмдағы парақшасы бұғатталғаны белгілі болды
Оралдық белгілі журналист Лұқпан Ахмедьяровты полицияға шақырғаны белгілі болды. Артынан «біз бәрін өзіміз шештік, бөлімшеге келмей-ақ қойыңыз» деп хабарласқанын айтты журналист.
«Бүгін полициядан қоңырау шалды. Костанай қаласының тұрғыны Украинаға қарсы соғысып жатқан путиндік Ресей жағындағы 600 қазақстандықтың тізімі жарияланғаны үшін маған арыз жазған. Сол себепті келуімді сұрап жатыр. Тергеуші мені қандай мәртебеде шақырып жатқанын нақты айта алмайды. Ол мені тергеуге емес, СҰРАҚ АЛУҒА шақырып жатқанын жазады. Мұндай тергеу әрекетін алғаш естіп отырмын», деп хабарлады Ахмедьяров. Одан кейін полиция қызметкерлері қайта қоңырау шалып, «барлық мәселе шешілді, полицияға келмей ақ қоюыңызға болады» деп айтқан.
Журналиске қатысты қысым мұнымен тоқтамады. Оның Инстаграм желісінде тіркелген парақшасы бұғатталды. Журналистердің негізгі жұмыс құралы әлеуметтік желілер екенін ескерсек, бұл олардың ақпарат тарату мүмкіндігін шектеу екені анық.
Естеріңізде болса, осыдан бірнеше ай бұрын Ахмедьяровты Астана полициясы ұстап, қылмыстық іс қозғалғанын, соның аясында онымен тергеу амалдары жүргізілетінін айтқан болатын. Журналисті ұстауға себеп – оның Оралдан барған Қазақстан азаматтарын Ресей билігі Украинадағы соғысқа мәжбүрлі түрде жіберіп жатқанын хабарлауы болды. Қазақстанның Ресейдегі консулдығы бұл мәліметті жоққа шығарып, оны жалған ақпарат тарату деп мәлімдеді.
